الجرح امتد بينا لي زمان الاهة تااااني !!

إليك احمل تباريح وجدي على أطباق من الإكليل ، يا من تسربتي بين ضلوعي القا وعافية وحضور..
إليك معزتي وإجلالي وعميق حبي أنثرهم على آذان الملايين دون خوف أو وجل ..
لا استطيع أن أطوع العربية لأكتب إليك عبارات وأحرف تليق بمقامك الرفيع .. لان الكتابة لحضرتك ضرب من التراجيديات التي تفجعني صباح ومساء .. وصلت مرحلة أن تكون الفاجعة بالنسبة لي مسلية وجميلة .. فاللحظات الهنية لا تمكث طويلا .. كعادة الغيوم الممطرة في صيف حالك ..
عزيزتي :
ما بين السُمرة وحاجة في لونك ..
حِس جواني بيرسُم كونك ..
حاجة بتنبع من الضحكة
وتقعد جوه هناك في عيونك .

افتقدتك .. والفقد يثبت لي انك لا تزالين مرسومة في خاطر المنى بتواشيح التوجس والأمل .. تلاشى عندى الإحساس بقيمة بالزمن .. لان محطات روعتك أوقفت التفكير في التلاقي مع زمن العتمة والشرود وأطنان الهواجس التي ملأت براحاتك دمعا ونحيبا وتنكرا.
عذرا .. قد نتلاقى ولو بعد حين !!

ما بين السُمرة وحاجة في لونك ..
حِس جواني بيرسُم كونك ..
حاجة بتنبع من الضحكة
وتقعد جوه هناك في عيونك .


تسلم من الآهات ياودالزرق ويسلم لك من تحب إن كان وطنا أو بشرا .
والف مرحب بالعوده الزاهيه .

ودعكور كيف حالك واحوالك .. وسلامتك من الحصار .

انا متاكد لو الناس اتجهت للكتابة بابداع ، سياتينا جيل من البسابير يحمل دهشة لاتنتهي .

والبسابير نفسها ليست بالهينة ولا اللينة حتى يتفوق عليها الاخرون في ضروب الابداع المختلفة . وبحكم معرفتي البسيطة ، وعمري ، اعرف مبدعين في شتى ضروب الكتابة من البسابير .

نتمنى ان تتاح لنا الفرصة نحاول تقديم نفسنا للبسابير واهلها.

مسدار الصيد
الشاعر / محمد أحمد بك أبوسن ( الحاردلو)

الشم خوَّخت بردن ليالي الحرَّة
والبراق برق من مِنَّا جاب القِّرة
شوف عيني الصقير بي جناحو كفت الفِّرة
تلقاها أم خدود الليلة مرقت برة
******
تعرف لي مشاهيد الرقاد والفَّرة
فلاَّخ المصب بيهو بتبين تتورى
فوق حيا فوق محل من الصعيد منجرة
ويا باسط النعم تسقيها في ها المرة
*****
أب عرَّاق فتق قرنو المبادر شره
والباشندي عمَّت مَهَششيب الدره
من النقرة كل حين فوق عليو منصره
وها الأيام محاريها القليعة أم غرة
*****
قدمت من هنا وبي أضانا سمعت كره
وفوق كرتوت شخيتيرًا تخيِّن خر
قُلاتو الوُهاط بي لشقة قبلو محره
يا باسط النعم ما تلقى فيهو مضرة
****
بت المن قرين مرقن علي الجبال
وفوق (بيَّه وبلوس) مابرجن الوبال
صُفرا درعتن تتدلى لا البهال
وبيضة شاش قرابيبن تريع البال
*****
مرقن يا مجيب لي جملة السؤال
شاحدك تجمعن من مطبق الحلال
ما ينقص حساب الدُّرْج ولو بي عجال
ونحن نجيب لهن في كل يوم موال

*****

من (بيلا) الصباح إتسربقن همال
والدوف فوق حقائبهن كترتو جمال
الخور العطيش بلداً عزاز ورمال
ومدروك ما هو من حر النهار بي كمال
******
قطعن (ودعول) بجرن شفاقي عدال
ختمن مقرح الحربة الجبالها طوال
قُلت أُمَّات قرود وردنو بي القبال
وخلقا كيف برمولن دمير حبال
*******
من امات رميلة متركشات لا شمال
وسمعن هدمي لا قدام كرير أضلال
بشلحط بريقن راح يشيل ولوال
تيسن زاعلن باكر مع الشهلال
*****
خلاهن رتوع في بقيل وخرجة نال
لا مت دور الوادي السرى سيال
فوق قمزوز طلع شاف في ملينو زوال
وقلعة (كو) حفيرها لقالو فيها نعال
******
مطامنات هناك لامن نهارن زال
وشرفن كلهن شمن دعاش اتعال
مابيات البلد دايرات حقو السروال
وصفاً متَّع الغناي قدر ما قال
****
في عاقب نهار سون لهن مرحال
وعينيهن خلقن زرق برا كحال
من كرف الحويل بقين دحين في حال
وديل ليمن على الناس المتلنا محال
*******
جاهن منزقف وقتا عصير وشفاف
وكاسب ليهو بيهن من صدف ما بخاف
ديل الطبعهن دايم الأبد عواف
في نايط السروج لقين بقيلا جاف
******
حجار المزار المن بعيد بنشاف
جرن فوقو دورن للفقر عراف
لافخ ود نهار من البحوم طراف
ولقى سبرون بقيلو من الملين مو جاف
******
شاف برقا بقل فوق الجبل رفراف
وهن وحل الدرار يا الليلة منو خفاف
من عند المضيق مرقن هناك بي سناف
وديل قِسْيَن علي القوي والمِتِلْنا ضعاف
*****
لونهن من بعيد متل البليبلي نضاف
مُرُد ومعِّصرات من شبة الأكتاف
للناس البغنوُّ لِن يجرو القاف
ماليات الخشم من كامل الأوصاف
*******

اتنشلن من الغبشة أم صهيب ناموس
وجين بين القصيرة وفوق فريع قلبوس
سدر المرمى لقين ردو مو مانوس
ووقعن بين حقاقيصو المعيز أربوس
******
خلاهن علي حجير الصفية حبوس
ولقى في الدهسريب قمبار وعرق فقوس
في المخلوقة شن تشبه معيز ام روس
غير الفي وريدن شولقن مرصوص
******
تيسن لي مراتعهن تملي بكوس
وديمة بقل علي البرق البشيل حرقوص
كم ذولا رقد فوق دربهن ممغوص
ومنو اتخلصن ماصيدن جاموس
*****
قامن منها اتنين مضاكرة تيوس
ولقين في السمير خطا وجيع مكبوس
دمجا أزرق مشهادو مو معفوس
ومنو بيردن الميع المقامو البوص
*****
اخدن في الميع دورين حسابهن تام
ومن أوديت بزاول شرفهن قدام
طلعن قوز كديس جاهن صقيط نمنام
ووصلن حد بطانة مرتع العدام
******
الهبريم طلق جاب للميع حوام
ومن شهر النفاس فضلن لهن أيام
جَنْ راجعات من القوز المقامو تمام
لونن يشبه البفت الجديد والخام
*****
ديل الطبعهن بالحيل خفاف وهمام
وفي سمير ود حريري مضقلات كل عام
قربن لي مواليد الرخيس وبعام
ومن عين البعاين سورة الأنعام
******
نون بالنجيع يا سابل الأكمام
اسبل سترك السابل علي النوام
تيسن جك مغرِّب وبي الملاين حام
جاهن وعافطنُّو وحيل سدوهن قام
*******
من دعت السراويل قبلهن دراتات
وفي العشنوق لقن زوزاي وبي فارات
عسكر خاف عليهن في ضرا نالات
وجاهن وجاعرن بعد النهار ما مات
*******
ختمن شابلك العارق التلات سدرات
وهكعن فوق عزاز حمريبه ام سوبات
دايش ليلي تام ما لقيت لهن مرحات
لامن هجسن باكر علي الطلحات
*****
خلاهن علي رد الفروخ بايتات
وفي المكفي الورا ام ميمون لقي ختيتات
متماسك سدوهن وبالحدوب شاتات
جاهن وجاعرن وجنو منحتات
******
ديل الديمة من رد الأنيس ناجعات
وكل حين فوق عليوا زاوي منجمعات
ضمر خلقة ما من قلة معيش ضايعات
تيسن دور الوادي الورا القلعات
*******
خلاهن علي رد الدموكيات
فلخ الفار مسيلباتو اتلقن باردات
في ترتير شدير ومعاهو حمريبات
تقلن وحضرنبو اللي النفاس دانيات
******
اتحلن جناهن في ضرا نالات
لامن درجنو وجف من السيبات
كم فوقن دقونا ولفن قافات
وقالن دوبا ليهن في الزمان الفات
******
الحي في الوجودو القالو قبلنا مات
كلو بلا هي بي لهج الطريفيات
شن ما قلنا فوق عنف الرقاب ساويات
قبلي ود أب شوارب جاب لهن كلمات
*****
يا باسط الأراضي والسبع سموات
وكلو الدابي حاف وأبو نعلات
دغس العين تنجيهن من الآفات
لا من وخرن بيلا المعيز ناجعات
*******
مرقن من مطيبقات الخوي أب دنان
وهكعن فوق معالق الوادي أبو ريحان
شافن في السمير سايمة وحيامة إنسان
وطلعن ها القليع المسمى بي النسوان
*****
المعزي المراتعهن سهول وقنان
انجبدن ثناييهن سداد في سنان
بعد ما اترقدن بي مطبق الوديان
يكتب لي لماهن ربنا المنان
******
كلبي الشارعو فيهن جا منقلب هقلان
واتحير قعد ساكت بقيت محنان
تيسن ديمة من حر الرحيح كملان
وجاهن من قفر بلدا بعيد ضبلان
*****
من الفجخاء هبر خـــلاهن
لا من دور أمات رميلة وجاهن
عند المتني فوق عاجبا جديد لماهن
ختمن بيلا فوق ميع البقر دلاهن
*******
المعزي البجازن ديمة فوق في خلاهن
بالغات النصاب أنصاري ما زكاهن
من ود البصير جايب إذن بغناهن
شوفن يا الزبير في لساني ديل ما احلاهن
******
جفلن من زوال شوفا بعيد باداهن
عرقن ود عول وادن قليلة قفاهن
ناس ابن الذريح ضربو المثل بي غناهن
من كاف السوام الميرغني بينجاهن
*******
من عوج الوكت ما بتركن وانساهن
فوق حيا فوق محل دايما بكوسو رضاهن
ملزوم بي مراتعهن وخبرة ماهن
وصلنو المصب واتوكرن في خلاهن

شنو الحكايه ياخال يادوب الجماعه ليهن كم ساعه غياب على طول ختيت أصبعك فى أضانك وبقيت تدوبي ( عشان تنسى ) أمال لو ليهن شهر زي حالي دا تبقي زي البشروقو .

ضحكتنى لامن الجماعة المارين قدام المكتب قالوا بالأمهرية الزول دا مالو؟ الجماعة معاى على النت فى الجانب الآخر. أخير لا تعليق عشان ماتحصل شماتة

وانا اقول ود التوم بدوبى مالو؟
شكرا ليك ود عكور انك خبرتنا،

قولى بسم الله صباحات الله بى خير. من وين ظهرت ليك مدة مابنت؟ الله يستر علينا من الحلة المرحة

المشاركة الأصلية كتبت بواسطة ودالزرق

ودعكور كيف حالك واحوالك .. وسلامتك من الحصار .

انا متاكد لو الناس اتجهت للكتابة بابداع ، سياتينا جيل من البسابير يحمل دهشة لاتنتهي .

والبسابير نفسها ليست بالهينة ولا اللينة حتى يتفوق عليها الاخرون في ضروب الابداع المختلفة . وبحكم معرفتي البسيطة ، وعمري ، اعرف مبدعين في شتى ضروب الكتابة من البسابير .

نتمنى ان تتاح لنا الفرصة نحاول تقديم نفسنا للبسابير واهلها.

الابن ابن الزرق لك التحية
شكرا لما تتحف به المنتدى من مواضيع هادفة .
الكتابة فى المنتدى تعطى الفرصة لابنائنا ان يظهروا مواهبهم ولكن يبدو لى ان بعضهم يستحى من اظهار ذلك، ليتهم يقهرون الحياء ويزينون هذا المنتدى بكتاباتهم،فكل ما يكتب يستمتع به الجميع. هلموا ابنائى وبناتى لدعوة ود الزرق ولنكتب جميعا ،ما يخطر ببالنا من شعر ونثر وقصة...الخ ، فالكتابة فى المنتدى تصقل الموهبة وتنميها ليتطور صاحبها للمنابر الاخرى من كتب ودواوين ...الخ.

والله بت رابحة غلبنا فيها حيلة. تقرا ليها مرة تقول ما فارقت الحلة شبر القط. تانى تجيبلها كلام تقول شدر العيش مابتعرفو. رسونا على حال ياناس المنتدى المخلوقة دى قلعتوها من ياتو قُلَّة من قلل العنج؟ ياربى من هكر السدر ولاّ الديم القديم ولاّ الحلة المرحة أقصد الحلة القوز. لاتمحنا ولا تبلينا.