انا راجياك يا الخاتم

انا البسابير ست الساس وست الراس وبت ال للدِرِك خلّاس
قليبى اتهدَّ من عشق الوليد اللخدر الفارس جنا الفُرَّاس
الا جفاهو يا امى حرق جوفى وخلخل فيا كل الشلتو من احساس
الا قليبى لسه معاهو لا بِنساهو لا جافاهو برضو معاهو مهما انداس(القلب)
مفعم بالوداد والريد وحبِى شديد تغلغل فى مسام الروح لا بتقال ولا بنقاس
الا جفاهو يا امى معذبنى ، وخوفى الشايلا من بدرى يزرع فِيْ بذور وسواس
ما اتزحزحت بى خطبة وليد الحوش جيوب مليانه بتراب القروش والماس
وتحنيسات جميع الناس، لفة راسى، بس بسراع طردتها من مسام الراس
ود بلدى اللخيدر فارس الفراس و سيد الناس فِضِلْ راجياهو بى اخلاص
الا جفاهو يا امى تاعبنى ومعذبنى ومبهدلنى ومجننى وتعبت خلاس
بس دايراهو يا امى يجينى الحين يجيب الدبلة يخطبنى ونقنِع بيها كل الناس
انا دايراهو يخطبنى وانا رضيانة يا امى ، لو لبسنى دبلة فضة والا نحاس
حتى ان جابا علبة بوهية حتى ان جابا خرطوش مويه حتى ان جابا فد كراس
لا همانى ود الحوش ولا بسمع كلاما بوص ولا بزغلل عويناتى البكبن دم، دهب داماس
بس دايراك تخطبنى واجمع بيك شتات نفسى واقول للجاى طالبنى ودعتك الله يلا خلاس
انا راجياك يا الخاتم تظهر فى يمينى تبين تبل صبرى وتسر بالى و ترفع راسى بين الناس

الله الله يابت رابحه على هذه الروعه والاحاسيس الصادقه والمعبره ، الظاهر عليها دي من الدفاتر الأولى؟ وإن شاءالله نشوف ما تبقى من الدفاتر

رااااااااائعة

الابن ابغرة والاخت Dr
اسعدنى مروركم، اشكركم كثيرا.

اختى الغالية ست الراس وست الساس
لما الاستعجال فقد صبرتى الكثير وما فضل غير القليل ومن هسى دقوا الصيوانات وركبوا الزينات وحضروا الضبايح للاحتفال.

للــه درك مــن شـــاعــره ملهمـــه . كلمـــاتــك فيهـــا البـلاغــه والتـــوريــه وتصـــويــر المستقـبــل الــزاهـــي وألأخضـــر لبــلـدنــا إن شـــاء اللـــه .
هـــاأنـــذا أحـــاول أن أجـــاريـــك وفـــق مقـدرتـــي آمــل أن أوفـــق بقـــدر المستـطــاع .


شـــاحـــد اللـــه يــا بلـــدي يجيـــك سيـــد النـــاس

وفـــوق إيـــديــه خـــاتـــي الحنـــه

ويهـــديــك يــا حــلـــوه عـقــد المــاس

وتفـــرحـــي بيـــه وتتـــهنــــي

وأيــامـــك تبقــــي حــــلـــوه خــــلاص

مـــا أصــــلـك درة يــا بلـــــدي وعــلــي

بنـــات جيــلـك مــــاخـــــده الكــــاس

دايـــرك تتـعـــلي زي ســـحـابـه

تخضــر أرضـنـا الطيبـــه بعـــد اليبــــاس

أصــلـك نــوارة الفـــريق الضــوايــا

يـا زينـة ربــــوع شـنــدي يـا منبـع الفـراس

فـــوق لسهيـــل شـخـصـك العــالـي

ودون سمــــاك ضـــاعـــت آمـــالـــي

وعـــز فـي جنـــون هــــواك الـنعــــاس

وغــنــت ليـــك بـــت رابحــــه

وزغـــاريـد فـلانـه فــات الحـد فـات الســـــاس

اللــــه يكفيــــك شــــر خلقــــوا

وشـــــر الـوســـــواس الخــــنـــــاس

حــــلات بلـــدي وحــــلات نـــاســـا

وبنــــوتـــا زي قـمـــرا

شــــق اللـيـــل

صـــبــح نبــراس

كـــان شـفـتــوهـــن بتعــــذروا

مـجـنـــون لـيــلــــي

الـفــي الـدهـــاريــب كــــــواس

جمــــــــــــــــــــيله كجمالك رائعة كوطني ..بس انا عايزه اعرف الخاتم دا قاصده بيه شنو وانتي الحمد لله متزوجه ..؟؟وود الحوش دا منوالانتي شوكشتي ..؟؟بس الظاهر كده حبيبتي هو الشوكشك واداك عصايتيني ..

حتى ان جابا علبة بوهية حتى ان جابا خرطوش مويه

ياسلاااااااااااااااام
والله يابت رابحة زمان البيت لمن يدخلو خرطوش جديد ولا علبة بوهية لكرعين العناقريب نحن ذاتو نفرح .
مشكورة بت رابح على هذه الكلام الجميل

رووووووعه بت رابحه

دائما رائعة يا بت رابحه .. ولكن حقا ماذا يعني الخاتم ..